Ақмола облысында реконструкциядан кейін екі теміржол вокзалы ашылды

Ақмола облысында Аршалы және Сарыоба станцияларының теміржол вокзалдарын реконструкциялау аяқталып, пайдалануға берілді, деп хабарлады Көлік министрлігінің баспасөз қызметі. Жұмыстар теміржол инфрақұрылымын жаңғырту бағдарламасы аясында жүргізілді.

Екі вокзалда да шатыр монтажы орындалып, ғимараттардың сыртқы және ішкі әрлеуі жүргізілді, сумен жабдықтау, кәріз, жылумен және электрмен жабдықтау желілері жаңғыртылды. Сондай-ақ іргелес аумақ абаттандырылып, перрондар қайта жаңартылды, ғимараттар заманауи жиһаз бен жабдықтармен жабдықталды.

Ғимараттардың фасадтары фиброцемент панельдерімен қапталды, ішкі әрлеу үшін қазақстандық өндірістің өртке қауіпсіз материалдары пайдаланылды. Аршалыдағы вокзалда мүмкіндігі шектеулі жолаушыларға арналған пандус орнатылды, екі нысанда да жаңа эвакуациялық шығу жолдары жабдықталды.

Аршалы станциясының вокзалы 1945 жылы салынған. Реконструкциядан кейін оның аумағы 150-ден 225,33 шаршы метрге ұлғайды. Станция арқылы елді мекенді Астана, Алматы, Қарағанды, Қостанай және Ресеймен байланыстыратын 10 жолаушы пойызы қатынайды.

1938 жылы салынған Сарыоба станциясының вокзалы 208,7-ден 225,33 шаршы метрге ұлғайтылды. Мұнда кентті Астана, Павлодар, Қарағанды, Шымкент, Семей және Түркістанмен байланыстыратын 10 жолаушы пойызы тоқтайды.

Көлік министрлігінде жаңартылған нысандар қауіпсіздік, энергия тиімділігі мен жайлылықтың заманауи талаптарына сәйкестендірілгенін атап өтті. Ведомствоның мәліметінше, бұл жолаушыларға қызмет көрсету сапасын арттыруға және өңір тұрғындары мен қонақтарына неғұрлым қолайлы жағдай жасауға мүмкіндік береді.