Қазақстанда жарты жыл ішінде ЖКО-дан қаза тапқандар 15,5 %-ға азайды

Бас прокуратураның баспасөз қызметі хабарлағандай, 2026 жылдың бірінші жартыжылдығында Қазақстанда ЖКО-дан қаза тапқандар саны 15,5 %-ға — 955-тен 807 адамға, жарақаттанғандар 6 %-ға — 22 346-дан 21 007-ге дейін азайды. Ведамствоның бағалауынша, бұл 148 адамның өмірін сақтап қалуға мүмкіндік берді.

Алты ай ішінде барлығы 15 188 ЖКО тіркелді, олардың жартысынан көбі жол ережесін қасақана бұзушылар тарапынан жасалған. Жаяу жүргіншілер өткелдерінде 5 971 адам жарақаттанып, 208 адам қаза тапты, оның ішінде 40 бала. Мас күйдегі жүргізушілердің кінәсінен 209 адам зардап шекті, сегізі қаза тапты. Ең ауыр зардаптар жылдамдықты асыру мен қауіпті маневр жасау кезінде болады: 8 мыңнан астам адам жарақаттанып, 676 адам қаза тапты.

Прокуратура қабылданып жатқан шаралар қатарына орташа жылдамдықты бақылауды, автошколларға лицензиялау тәртібін қайтаруды, мопедтерді міндетті тіркеуді, бұзушылықтарды автоматты тіркеуді кеңейтуді және жүргізушілер туралы медициналық қарсы көрсетілімдері бар мәліметтермен алмасуды жатқызады. Қасақана бұзушылар енді ұсақ бұзақылық үшін жауапқа тартыла бастады: жыл басынан бері Әкімшілік құқық бұзушылық туралы кодекстің 434-бабы бойынша 29 адам қамауға алынды. «Цифрлық қадағалау» жүйесі негізінде жүргізуші тәртібіне балдық бағалау пилоты іске қосылды.

25 тамыздан бастап 65 жастан асқан жүргізушілер мен мүгедектігі бар жүргізушілер үшін медициналық тексеруді бақылау тәртібі өзгереді: тексеруден өткені туралы мәлімет болмаған жағдайда куәліктің қолданылуы автоматты түрде тоқтатылады, ал 073/у нысаны бойынша анықтама келіп түскен соң — қайта жанданады. Медициналық тексеруден өту міндеті 2014 жылдан бері қолданыста; прокуратура оны алдын ала өтуді ұсынады.